Greece aṭangin Turkey-ah raltlan thawn kir chhunzawm
European Union leh Turkey-in inremna an lo siam tawh angin, Turkey ram aṭanga Greece rama raltlan lutte chu Turkey ramah thawn kir chhunzawm an ni.
Inremna an siamah chuan March 20 hnu lama dan loa Greece rama raltlan lutte chu Turkey ramah thawn kir tur an ni. Syrian raltlan an thawn kir zat ang chu Turkey ram aṭang hian Europe ram hrang hrangah thawnchhuah an ni thung ang. Mahse Turkey President Recep Tayyip Erdogan chuan inremna an lo siam tawh chu EU in a tihtur a hlenchhuah chauhin a taka kalpui a ni ang, a ti.
Greece custom official-te chuan nimin khan lawng pahnih hmangin Turkey ramah hian raltlan 140 thawn kir an ni tih a sawi. Turkey rama an thawn kir zinga Syria mi ni lote chu deportation centre-ah dah an ni ang a, Syria mite erawh chu refugee camp-ah hruai nghalin, heta aṭang hian Europe ramah thawn dan tur buaipui leh a ni thung ang.
Greece chuan a rama raltlan lut an pun chak avangin ramri a khar a, hei vang hian Greece aṭanga Europe ram dang pan tum, raltlan tam tak chu ramri-ah an tang mek a ni. Ningani khan Greece leh Macedonia inkara raltlan tangkhangte chuan ramri khar tura phutin police-te nen an intibuai a ni. Nikum aṭang khan lawng hmangin Turkey kaltlangin Greece ramah mi maktaduai khat chuang zet an lut a, Greece aṭang hian German leh EU hmarlam ramte an pan leh ṭhin a ni.