IS firfiakten factory hnathawk 300 ru bo

Islamic State (IS) firfiakte chuan Syria khaw≠chhak lama cement factory-a hnathawk mi 300 chuang an ru bo niin Syrian state TV chuan a sawi.

Firfiakte hian kar tir lam khan Syria khawpui, Damascus khawchhak lam km 50 vela hla, Dumayr khuaa Al Badia Cement company chu an bei a, hnathawktu tam tak an ru bo a ni. An mi rukbote hi tun thlengin biak pawh theih an la ni lo.

Hetihlai hian Lebanon lama helpawl dang pakhat chuan IS mi rukbo zinga engemaw zat an chhanchhuak niin an sawi a, chanchin kimchang erawh hriat theih a la nilo. IS hian hnathawktu an rukbo zinga mi 10 vel chu phatsantua puhina an lu an tansak tawh nia sawi a ni bawk.

Syrian Observatory for Human Rights chuan IS ten Dumayr khua an beihnaah hian Syria sipai leh sipai thlawptu pawl ami mi 20 vel an thi niin sawi.

Al Badia Cement factory hi Dumayr khaw daia awm a ni a, he khuaah hian tunhnaiah IS leh Syria sipaite hi an inbei nasa hle. IS hian khawpui bula airbase leh power plant chu sipaite kut aṭang hian laksak an tum a, mahse an la hlawhtling thei lo a ni.

Hetihlai hian IS-ten Iraq rama khua an awp zinga Falluja khuaa chengte chuan ei tur an tlachham ṭan tawh niin US-a hmunpui nei, Human Rights Group (HRW) chuan a sawi. Falluja khua hi sorkar sipaiten laklet an tum a, firfiakte nen hian an inbei mek a ni. Hei vang hian khawpui in chakkhai a lakluhna kawngte chu firfiakte hian a khar vek a, khawpui chhung aṭanga mipuite kalchhuah pawh an khap bawk. HRW chuan khawpui chhunga ei tur awm chhunte chu man to tak taka hralh a ni a, mi ṭhenkhat chuan chaw tan hnimhnahte an rin a ngai tawh hial niin a tarlang. Damdawiin-ah pawh nitin naupang, ei tur neih loh avanga damlote an lut reng niin a sawi bawk.