NKorea-in SKorea President bei leh

North Korea chuan a ṭhenawm ram, South Korea President Park Geun-Hye chu na takin a bei leh a, ' sawi ngaihna awm lo khawpa hmeichhe sual, indona chawh chhuah duh mi' tiin a sawi.

Committee for the Peaceful Reunification of Korea (CPRK) chuan kar kaltaa US President Barak Obama hoa nuclear security summit neiha President Park-in NKorea nuclear program chungchang a sawisel chu chhang letin, Park-i chetdan leh thusawi duh dan chu 'mi sual inhrosa ang mai a ni' a ti.

North Korea media-te hian South President hi a mimalin an bei nasa hle a, a chungchang sawina atan ṭawngkam mawi lo tak tak te an hmang fo a ni, 'ui hur', 'nawhchizuar' ti hial tein a lo sawi tawh.

Nimina NKorea official KCNA news agency-in Park-i sawiselna a tihchhuahah hian, South President-in NKorea chu a nuclear weapon programme titawp tura a nawr chhunzawm chungchangah Park-i chu 'mi phutkhat,a chhehvela thil thleng engmah hrethiam pha lo' tiin a sawi. Park-i chuan North leh South Korea inkar chu dinhmun ṭha lo takah nawr lutin, indo chhuah mai hlauhawmin a siam a ni, a ti.

South Korea chuan nimin vek khan North Korea hi a vau let ve nghal. Unification Ministry thupuangtu, Park Soo-Jin-i chuan, "South Korea sorkar chuan North chu kan ram hruaitu chungchang ṭawngkam mai lo taka sawi tawh lo turin a hriattir a, a vauna thu pawh an tichhuak tur a ni lo" a ti.