IS-in an mi mante an chhuah niin an sawi Syria TV-in an tihlum niin a sawi thung

Islamic State (IS) firfiak pawl chuan Syria rama cement factory-a hnathawktu mi 300 an ruk bote chu an chhuah niin an sawi a, hetihlai hian Syria TV report chuan IS hian an mi man zinga mi 175-te chu an tihlum niin a sawi thung.

IS Amaq news agency chuan hnathawktu zinga 20 te chu an hreng a, Druze hnam mi pali an tihlum bawk a, a dangte chu thu an zawhfiah hnuah an chhuah niin a sawi. Hnathawktute hi kar kalta kar tir lama Damascus hmarchhak lam, Dumair khuaa cement factory atangin man an ni a, an kawl chhung hian ei tur leh damdawi lam enkawlna pawh an pe niin an sawi.

An mi man zingah hian Muslim ni lo leh Syria sorkar aiawhte an awm leh awm loh an zawt a, an hren zui tak mi 20-te chu National Defence Forces member-te niin sipaite chuan an tarlang.

US Air Force chuan kar kalta Inrinni han Syria leh Iraq-a IS firfiak pawl laka beihpui thlakna neih meka hman turin B-52 bomber a tir. B-52 Stratofortress aircraft hian Inrinni khan Qatar a thleng a, he bomber hi kum 2006-a Afghanistan indona-ah khan hman a lo ni tawh bawk a ni.

US Air Forces Central Command commander, Lieutenant General Charles Brown chuan B-52 hi IS laka beihpui thlak mek,
ṭangrual sipaite chuan an chhawr ṭangkaipui hle a rin thu a sawi. Long-range heavy bomber, B-52 hian nuclear ralthuam a phur thei a, Afghanistan bakah kum 1991-a Gulf War leh Vietnam War-ah te pawh khan hman a lo ni tawh bawk. IS beihna tur hian bomber hi eng zat chiah nge tirh a nih erawh tarlan a ni lo.