Philippines-a inbeihnaah sipai 18 an thi

Philippines sipai 18-te chu an ram chhim lama Islam firfiakte nena an inbeihnaah an thi a, sipai 50 chuangin hliam an tuar.

Kar kalta Inrinni khan sipaite hi Basiland thliarkarah Abu Sayyaf firfiak pawl nenan inbei a, sipaite hian firfiak panga an kaphlum a ni. Sipaite hian Islamic State(IS) nena inzawmna neia an puh, Abu Sayyaf commander Isnilon Hapilon chu man tumin an bei a ni. US sorkar chuan Hapilon man a nih theih nana a chanchin hrilh thei hnenah dollar maktaduai 5 pek a phal thu a lo chhuah tawh bawk.

Firfiakte bei tura sipai kalte hi kawng lakah ambush an nih thu army thupuangtu, Colonel Benedict Manquiquis chuan a sawi. Tlang
aṭanga an lo ambush avangin sipaite tan bihruk theih a ni lo a, an kalna lamah nasa takin an lo kap zui niin a sawi.

Sipaite leh firfiakte inbeih hma hian Abu Sayyaf-te hian Italian missionary an man, Roland Del Torchio chu thla ruk zet an hren hnuah an chhuaha. Abu Sayyaf pawl hian an rama ramdang mi awm an ru bo fo a, ramdang mi 18 an la hren zingah hian Canada mi pahnih leh Norway mi pakhat pawh an tel. Heng mite hi Basiland thliarkar bul, Jolo thliarkarah an hreng nia hriat a ni. Abu Sayyaf pawl hi kum 1990 chho khan Al-Qaida firfiak pawl ṭanpuina sum pek hmanga din a ni.