Pakistan PM atan Shehbaz Sharif thlan a ni

Pakistan chuan February thla tira inthlanpui an neih hnuah Pakistan Muslim League-Nawaz (PML-N) leh Pakistan Peoples Party (PPP) te chuan ṭangrual sorkar siamin, Inrinni khan session ṭan a ni a, session-ah hian sorkar thara Prime Minister atan Shehbaz Sharif thlan a ni.

Pakistan parliament-ah hian PML-N leh PPP te candidate inṭawm, Shehbaz Sharif hian a khingpui, Imran Khan-a party, Pakistan Tehreek-e-Insaf (PTI) candidate Omar Ayub Khan a hneh a ni. Sharif hian house member 336 awm aṭangin vote 201 a hmu a, Ayub Khan hian vote 92 a hmu ve thung.

Shehbaz Sharif hi vawiin hian Prime Minister atan lak luh a ni dawn a, lak luhna hun hi President chenna, Aiwan-e-Sadr-ah hman a ni ang. Shehbaz Sharif hi Prime Minister a nih ṭum hnihna tur a ni a, April 2022 leh April 2023 inkarah khan ṭangrual sorkarah Prime Minister hna hi chelh tawhin, inthlan neih tur avanga parliament ṭhiah a nih thlengin a thawk a ni.

PM atana thlan thar Sharif hian party-a a thawhpuite zawng zawng chu sorkar kaihruai tura amah an rin avangin lawmthu a hrilh. Kum 72 mi, Shehbaz Sharif hian parliament-ah theihna nei ṭha tak tak, Pakistan kaihruai tura tlak ṭhiau an awm thu sawiin, hna harsa leh khirh tak hmachhawn tur nei mah se, Pakistan-in a thlen tur dik tak a thlen theih nan theihtawp an chhuah tur thu a sawi tel bawk.