US President inthlan chuh turin Trump-a'n a dinhmun sawh nghet zel

United States of America chuan kumin kum tawp lam hian President thar thlanna an nei dawn a, inthlan hi US President hlui Donald Trump pawhin Republican party thlawpna in chuh ve leh a tum a, chumi tur atan chuan a dinhmun pawh a ṭha thawkhat tawh hle.

Michigan, Missouri leh Idaho-ah Trump hian candidate inchuhnaa a khingpui Nikki Haley chu a hneh vek avangin Republican President candidate ni turin a dinhmun a ṭha tawh hle a ni.

Inrinni liamta khan state pathum Michigan, Missouri leh Idaho-ah Republican candidate tur hi party mi leh sate chuan an duh an thlang a, Trump hian a khingpui awmchhun ni tawh United Nations ambassador hlui Nikki Haley chu state pathumah hian a hneh vek a ni. Trump leh Haley-te inkhin tawhna state - Iowa, New Hampshire, Nevada, Virgin Islands, South Carolina, Michigan, Missouri leh Idaho-ahte Trump hian hnehna a la chang vek. State inthlan neih tawhna aṭang hian Trump hian amah thlawptu Republican palaite vote 244 hmu tawhin a khingpui Haley chuan 24 chauh a la hmu thung. US President thlanna neih tura party official candidate ni tur chuan Republican palai 1,215 talin an thlawp a ngai a ni.

Trump leh Haley hi inthlan neih lehna tur North Carolina-ah an la cham chhunzawm a, Trump chuan thu a sawinaah,"Vawiin hian in President hlui emaw President thar la nimai thei angin ka lo ding lo a, kan ram mumal lo taka kaihruaitute leh anmahni thlawp tute hmachhawn tura lo ding ka ni zawk" tiin President ni lai Biden leh a kaihhruai sorkar chu a bei. Donald Trump hian Republican aiawh tura thlan a nih chuan Democrat candidate leh President nilai Joe Biden nen kum tawp November-a inthlanah an inkhing dawn a ni a, Kum 2020 inthlanah khan an lo inkhing tawh bawk.