Yemen-ah inkahhai hmang ṭan

Yemen sipai leh Houthi helpawlten inkahhai an puan chu Pathianni zanlai aṭang khan hman ṭan a ni. April 18 hian inremna siam dan kawng zawngin Kuwait-ah inbiakna an nei dawn bawk a ni.

Sipai leh helpawlte inbeihna avang hian mi 6,200 chuangin an thih phah tawh a, mi 120,000 vel chu hmun him lamah an tlanchhe tawh bawk.

Yemen tualchhung buaina thlengah hian Saudi Arabia kaihhruai ṭangrual ramte chuan Yemen sipaite puiin hel lakah hian kum khat chuang zet beihpui an thlak tawh a ni. Ṭangrual pawl thupuangtu, Brigadier-General Ahmed al-Asiri chuan inremna siam chu zawm turin Houthi helte chu a ngen a, "Inkahhai thuthlung hi palzut a nih chuan bei let turin dikna kan nei a ni" a ti. Yemen sipai official leh helpawl aiawhte chuan Saudi Arabia chhim lamah inkahhai puanna tur inremna tur hi an duang niin a sawi. Inkahhai puan chhung hian ṭangrual sipaite chuan Saudi leh Yemen ramri-a thil awmdan chu an la thlithlai zui reng dawn tih a sawi bawk.

Inkahhai puan a nih hma lawk hian pawl hnihte hi Sanaa hmarlam, al-Maton ah nasa takin an inkap a, mi 20 chuang an thi niin local official-te chuan an sawi.

Nikum March 26-a Arab ṭangrual ramten Yemen sorkar thlawp a, Houthi hel ho laka beihpui an thlak hnua pawl hnihten inkahhai an puan ṭum li-na a ni. UN chuan Yemen pawl hnihten inkahhai an puan chu hlawhtling taka an kalpui a beisei thu a sawi.