Hong Kong zirlai hruaituin political party din

Hong Kong-a democracy din a nih theihna atana beitu, zirlai pawl hruaitu Joshua Wong chuan Pathianni khan political party Demosisto a din.

Hong Kong-a democracy campaigner lar ber, Joshua Wong hi kum 19 mi chauh a la ni a, kum 2014-a mipuite an duh thlan an vote theihna tura an dikna chanvo pek phuta an beihna,Umbrella Movement aṭang hian hriat a hlawh chho a ni. Inthlanah Wong hian a la chuh thei ve dawn lo a, mahse an party chuan September thlaa Legislative Council inthlanah candidate an siam dawn tih a sawi.

Wong chuan an thil phut tihhlawhtling turin kawtthlerah beih ringawt chu a tawk lo a, "Kalphung awmze nei leh tum nei chunga political party din a ngai a ni" a ti. Political party thar a din dawn vang hian student activist group a din, Scholarism pawh a ṭhiat nghal a ni. An party din thar chuan tharum thawhna reng reng a thlawp dawn lo tih sawiin, street politics chu an la khel chhunzawm zel dawn tih a sawi bawk.