IS-ten Syria-ah Kristian 21 tihlum

Islamic State (IS) firfiak pawl chuan Syria-a al-Qaryatain khuaah Kristian 21 an tihlum.

Syrian Orthodox Churh chuan he thu hi sawiin, firfiakten an tihhlum zingah hian hmeichhe pathum an tel niin a tarlang.

Al-Qaryatain khua hi nikum August thla khan IS hian an la a, mahse kar hmasa khan Russia puihnain Syria sipaite chuan an la let leh a ni. IS ten al-Qaryatain an lak lai hian Kristian 300 vel an awm. Firfiakte hian khawpui an lak hnu hian sakhaw dang betute pawh Islam dan anga awm vek turin an ti a, Kristian ṭhenkhatte chu tlanchhiat an tumna lamah an tihlum a, ṭhenkhat chu Islam dan an zawm duh loh avangin an tihlum bawk.

Syrian Orthodox Church hotu, Patriarch Ignatius Aphrem II chuan Kristian panga-te chu an chin hriat lohin an awm mek tih a sawi a, hei bakah hian firfiakte hian Kristian hmeichhiate chu sal atan hralh an tum bawk a ni, a ti.

IS firfiakte hian al-Qaryatain an lak hnu hian khawpui chhung hi an tichhe nasa hle a, kum 1,500 zeta upa Catholic monastery pawh an tihchhiatsak a ni. Syria sipaiten an lak let hnuah khawpui
aṭanga tlanchhia mi eng emaw zat chu phurh kir an ni tawh. Syria sipaite hian tun hnaia khawpui pawi≠mawh tak, Palmyra chu IS lak aṭang hian an lo la let tawh bawk a ni.