Ukraine PM a bang dawn

Ukraine Prime Minister Arseniy Yatsenyuk chuan Pathianni khan a bang dawn tih a puang

Ukraine TV channela '10 minutes with the prime minister' program tihchhuahah, Yatsenyuk hian PM aṭanga ban a tum thu hi a puang a ni.

Yatsenyuk hian a banna chhan ber chu kum 2015 kumtawp lam aṭanga an ram politics buaina vang a nih thu a sawi. "Politics buaina kan tawh mek hi tute emaw siamchawp a ni. Mimal pakhat thlak danglam tum vang hian politician-te an mit a del phah a, ram tana an tha thawhna tur pawh a tibahlah vek a ni" a ti.

Arseniy Yatsenyuk chuan vawiin hian parliament-ah a banna lehkha a thehlut dawn a, parliament-in a pawmsak chuan Ukraine Constitution-in a tarlan angin sorkar pawh
ṭhiah nghal a ni ang.

Thla hnih liam taah khan Yatsenyuk hian parliament-ah fiahna a lo paltlang tawh a, mahse march thlaa an rama zirna in hrang hrangte enkawl zo loa puh leh eirukna tibo zo loa puh a nih hnuah amah thlawptu hi an tlahniam sawt hle.

Kum 41 mi, Yatsenyuk hi kum 2005-2008 inkar khan economy minister, foreign minister leh parliament speaker te a lo ni tawh a ni. Kum 2014 Ferbuary thla khan sorkar paihthlak a nih hnuah thuneihna a chang a ni.