Kerry-an Hiroshima Memorial a tlawh

US Secretary of State John Kerry chuan nimin khan Indopui II hunlaia America-in Hiroshima, Japan-a atom bomb a thlak hriat≠rengna hmun siam, Hiroshima Peace Park Memorial a tlawh. Kerry rual hian G7 foreign minister-te pawhin an tlawh a ni.

Kum 71 liamtaa US-in Hiroshim leh Nagasaki khuaa atom bomb a thlak avang khan mi 140,000 velin an thih phah a ni. He thil thleng vang hian ram pahnihte inkar boruak pawh a chhe rei hle a, kum rei tak chhung chu US hian Hiroshima-ah hian palai pawh a tir ngai lo a ni.

Kum 2010 khan khatih laia Japan rama US ambassador, John Ross chuan bomb thlak vanga thi te hriatrengna hun hman hi a telpui a, hemi hnu aṭang chuan US ambassador-te chuan an telpui ziah tawh a ni. Kerry hi US Secretary of State zingah Hirsohima tlawh hmasa ber tu a ni.

US President Barack Obama chuan May thla hian Ise-Shima, Japan-ah G7 summit hmang turin a kal dawn a, ani pawh hian Hiroshima hi a tlawh mai thei niin locial media te chuan an tarlang.

Kerry leh G7 foreign minister-te hian Peace Park Mermorial-ah hian pangpar dahin, mitthite sun nan minute khat chhung ngawi rengin an ding a ni.

John Kerry chuan Hiroshima a tlawh chuan remna leh muanna pawimawh zia a lantir a beisei thu a sawi a, khawvel him leh nuam zawk siam tura ram hrang hrangte thawhhona pawimawhna lantirin, chhiatna rapthlak tak tak thlen theitu ralthuam hlauhawmte chu tihbo an nih theih ngei a beisei thu a sawi.

Hiroshima-ah G7 foreign minister meeting neih a ni a, he hunah hian minister-te chuan Middle East buaina thleng mek te, North Korea-in missile leh nuclear test a neih leh, China sipaite South China Sea-a an luh chungchangte an sawiho a ni.