Israel leh Morocco-in Inlaichinna siam an remti

United States hmalaknain Israel leh Morocco ramte chuan inlaichinna siam an remti. Morocco hi Arab ram zinga thla li chhunga Israel nena inzawmna siam remti ram palina a ni. 

US president Donald Trump chuan ram pahnihten inzawmna siam an remti a nih chuan, hun rei tak chhung ram inchuh avanga an lo buaina, Western Sahara a thuneituah Morocco pawm a remti a ni. Western Sahara-ah hian Algeria ram thlawpin Polisario Front chuan Morocco aṭanga inlahrangin independent state din an tum a, he biala thuneitu inchuh hian hun rei tak an buai tawh a ni.

Ningani khan President Trump chuan Morocco lal, King Mohammed VI chu tele­phone-a biain, inremna siam hi a nemnghet a ni. 

Morocco hma hian Arab ram pathum United Arab Emirates, Brahrain leh Sudan ramte chuan Israel nena inzawmna hi an lo siam tawh bawk.

Palestinian-te chuan inremna siam hi na takin an sawisel nghal a, hun rei tak an lo phut tawh, Israel-in Palestinian ram a luahsak chhuahsan a, Palestinian ram hran din tuma an beihna chu Arab ramte chuan an phatsan zel niin an puh. 

Gaza Strip-a rorel lai, Hamas thupuangtu Hazem Qassem chuan he inremna siam hi thil sual a ni tiin, Palestinian mipuite duhdan a ni ngai lo tih a sawi. Israel chu Palestinian mipuite chungah a inluling zel a, a ram a luahsak pawh a zauh belh zel a ni, a ti. 

Hetih lai hian Morocco King Mohammaed chuan Palestinian president Mahmoud Abbas chu biain, an ram chuan Israel-Palestinian inkara inremna siam a, ram pahnih dinna tur hmalakna chu a la thlawp reng tih a sawi. 

Hemi rual hian inremna tluantling chu Israel leh Pales­tinian-te inbiakna hmang chauhin a siam theih dawn tih a sawi bawk.