Pakistan PM bana tura ngenna thehlut

Pakistan Prime Mi≠nister Nawaz Sharif-a chu Panama paper putru-ah chhiah awlruk tum vanga rampawn lama sum chheprelh zingah a hming a lan avangin Lahore High Court-ah PM a nihna aṭanga ban tura ngenna thehluh a ni.

Petition thehluttu hi Gohar Nawaz Sindhu a ni a, PM Sharif-a chuan sum a chheprelh avang leh mipuite laka a thil neihte a zep avangin PM ni zui zel tlak a ni lo, a ti.

Lahore High Court Justice Shahid Wahid chuan petition hi a ngaihtuah hnuah, sorkar law officer-in he petition a dodalna chu hnawlin, Sindhu hnenah hian rampawn lama Sharif-an company pahnih a nei nia sawi chu finfiahna thehlut turin a ti a, April 14 ah a ngaihtuah chhunzawm leh ang.

Panama Paper put≠ru-ah khan ram pawn lama sum thukru zingah ram hruaitu hming eng emaw zat a lang a, an zingah hian Sharif-a pawh hi a tel a ni. Sharif-a hi UK-a company neia puh a ni. Petition thehluttu chuan, "Prime Minister fapa Hussain Nawaz ngei pawhin Pakistan ram pawn lama company an neih thu hi a sawi tawh a, hei vang hian PM hi ban a ni ngei tur a ni. Heng company-te hi kum 1993 leh 1994-a a lei ni mah se, PM Sharif hian Election Commission of Pakistan (ECP) hnenah a thil neihte hi a thehlut tel lo a ni" a ti.