Beirut-a chhiatna thleng chungchangah Lebanon PM leh minister hluite thubuai siamsak

Lebanon khawpui, Beirut-a lawngchawlhna hmuna kumin August 4-a warehouse-a puak thei thil dahkhawm, ton 3,000 puakin khawpuia chhiatna rapthlak tak a thlen kaihhnawihah Lebanon prime minister Hassan Diab leh minister hlui pathumte chu thubuai siamsak an ni.

Beirut-a thil puak nasa tak thleng vang hian mi 200 vel an thi a, mi 6,000 chuangin hliam an tuar bawk. Thil puak hian khawpui chhungah in, dawr leh motor tam tak a tichhe bawk a, a thil tihchhiat hlut zawng hi US dollar tluklehdingawn tel a tling. 

Chhiatna thleng chhuitu, judge Fadi Swan chuan Ningani khan PM Diab bakah minister hlui pathum Ghazi Zaeiter, Youssef Fenianos leh Ali Hassan Khalil te chu an mawhphurhna ngaihthahah puhin thubuai hi a siamsak a ni. Kar leh lamah thu zawhfiah turin koh an ni ang. 

Beirut lawngchawlhna hmuna chhiatna thleng kaihhnawihah hian mi 37 thubuai siamsak an ni tawh. 

Mipui chenna aṭanga hnai tea puak thei thil hlauhawm  tam tak dahkhawm a nih chungchangah sorkar chuan sawisel pawh a tawk nasa hle. Hei vang hian chhiatna a thlen hnu hian Diab-a kaihhruai sorkar pawhin banna a thehlut nghal a, mahse inthlan buatsaih a nih hma chuan caretaker angin an la awm a ni.