Egypt minister hlui eiruk vangin a tang dawn

Egypt court chuan an ram agriculture minister hlui leh a officer manager-te chu eiruknaa an inhnamhnawih avangin thiam loh chantirin, kum 10 tang turin a hrem.

Minister hlui Salah Eddin Helal hi kum 10 tan bakah dollar 110,000 chawi tura tih a ni a, a chief of staff Muhyiddin Said chu dollar 55,000 chawi tura tih a ni bawk.

Helal hi man tlawm taka sorkar ram hralh a nih theihna atana thamna laa puh a nih avangin nikum September thla khan minister a nihna aṭangin a bang a ni. Prosecutor-te chuan thamna a lak zingah hian in tha tak, sports cluba-a member nihna leh thawmhnaw man to tak tak te a tel niin an sawi. Thamna petu, sumdawng leh a mi chhawr erawh chu thuneitute hmaa an inpuan avangin jail tan tir an ni dawn lo thung.

Kum 2015, May thla khan Egypt president hlui Hosni Mubarak leh a fapate pahnih chu sorkar sum tichingpena puh an nih avangin kum 3-4 tang turin hrem an lo ni tawh a, a hnu thla hnih lekah Mubarak-a hnuaia prime minister dinhmun chelhtu, Ahemd Nazif pawh eirua puh a nih avangin kum nga tang tura hrem a ni.