Hong Kong media tycoon Jimmy Lai thubuai siamsak

Hong Kong democracy activist leh media tycoon, Jimmy Lai (73) chu ram dang mite nena thawkduna rinhlelh chungchangah  national security law hnuaiah thubuai siamsak a ni. 

Hong Kong inrelbawlnaa China inrawlh dan chungchang na taka sawisel fotu, Apple Daily chanchinbu neitu, Lai hi vawiinah court-ah a inlan ang. A chanchinbuah hian China leh Hong Kong sorkar sawiselna a chhuah fo a ni. 

National security law hnuaiah hian China aṭanga inlakhranna lam hawia thil ti, firfiaka chetna kaihhnawiha tel leh ram dangte thawhpuia puh chu dam chhung tang tura hrem theih an ni. He dan hi kumin June thla aṭang khan Hong Kong-ah hian hman a ni a, hei hi khawthlang ramte leh human rights pawl hrang hrangte'n an sawisel nasa hle a, sorkar eptute rahbehna atana hman tura duan niin an puh a ni. 

Lai hi August thla  khan polie officer 200 vel chuan a office-ah luhchilhin an lo man tawh bawk a. Ani bakah hian mi dang 10 pawh ram dangte thawhpuiah puhin an man bawk. 

Lai hi US-ah kal foin, official-te pawh a lo hmu ṭhin a, Secretary of state Mike Pompeo pawh hmu tawhin, Hong Kong-a democracy phutna kawngzawh huaihawt thlawp turin a ngen a ni. Hei vang hian China chuan ram phatsantuah a lo puh tawh a ni.