IDF-te'n Gaza hmar lama leiverh lian ber tichhia

Israel Defence Force (IDF) chuan Gaza Strip hmar lama Hamas pawl leiverh siam an hmuhchhuah zinga lian ber chu nimin khan a tichhia tih an puang.

He leiverh hi km 4-a thui niin, Erez crossing-ah a tawp a, Israel ram chinah erawh an verh lut lo. Israel-Hamas indona thlen hnu lawk, nikum December thla khan Israel sipaite hian an hmu chhuak a ni.

IDF chuan hun eng emaw chen chu leiverh hi uluk taka an enfiah thu sawiin, IDF Gaza Division engineering unit, Yahalom unit, IDF Southern Command leh Defence Ministry-a engineering and construction division-te nen thawkhoin, leiverh hi an tichhia tih a tarlang.

Leiverh chhungah hian electricity leh communication infrastructure te pawh awmin, Israel sipai lo danna tura siam, top door-te a awm bawk. Motor-te pawh a tlan thei bawk a ni. Leiverh-ah hian Hamas ralthuam thuhruk eng emaw zat an hmuchhuak tel bawk.

Nikum October thla aṭanga Israel-Hamas indona a thlen hnuah, Israel sipaite hian Gaza Strip-ah Hamas pawl leiverh siam tam tak hmuchhuakin an tihchhiatsak tawh a ni.

Hamas-te'n Israel an beihnaah pawngsualna a thleng : UN team

United Nation-in Israel leh Hamas indonaah mipat hmeichhiat chungchanga dan bawhchhiatna a thleng em tih enfiah a, zir chiang tura palai a tirhte chuan Thawhṭanni khan report an theh lut. He report-ah hian nikum October 7-a Hamas firfiakte'n Israel an beih ṭum khan pawikhawihna, pawngsual thlengin a thleng ngei nia a lan thu an tarlang.

UN mi tirhte hian kar hnih chhung zir chianna hi neiin mi hrang hrang an kawm kual a ni. Kar hnih hnuah, UN special representative on sexual violence, Pramila Patten chuan New York-a UN headquarters-ah zir chianna hi a theh lut a ni.

Report-ah hian nikum October 7-a Hamas-in Israel chhim lam an beih ṭum khan pawngsualna a thleng ngei tih rinna an neih thu tarlan a ni. Hemi bakah hian Hamas mi hrente chuan pawngsual an tawk ngei tih finfiahna ṭha tak an neih thu an sawi lang bawk. Hamas lam chuan report hi a dik lo niin an sawi ve thung a, an mi lah sate'n Israel an beih ṭum khan mipat hmeichhiatna lama pawi khawih an awm lo tiin an ṭang ve thung.

October 7, 2023-a Hamas-te'n Israel an beih khan mi 1,200 vel an thah bakah, mi 253 vel manin an hreng zui a, an mi hren zinga ṭhenkhat chu chhuah ni tawh mah se, a tam zawk chu Hamas kutah hian an la awm a ni.