May 10 hmain India sipaite an chhuak vek ang : Maldives President

Maldives President, Mohamed Muizzu chuan May 10 ral hmain an ramchhunga India sipai la chambang zawng zawngte chuan Maldives an chhuahsan vek dawn tih a sawi.

Eptu pawl lamin sorkarin India sipai, an rama awmte thawn kir angin sawi mah se Maldives-ah hian tam tak an rawn kir leh tawh thu an sawi chu President Muizzu hian a chhang let a ni. Muizzu chuan India sipaite thawn kirna kawngah a kaihhruai sorkar chuan hlawhtlinna a chan chu eptu lam hian itsikin thudik lo an theh darh ta niin a sawi ve thung.

India leh Maldives hi ram inṭhianṭha ṭhin tak ni mah se, nikuma President atana thlan tlin, Mohamed Muizzu hi China lam âwn a nih avangin India leh Maldives inlaichinna hian a tawrh phah ta a ni. India leh Maldives mi pawimawhte chu February 2 khan Delhi-ah inbiain, hetah hian Maldives rama awm mek India sipaite chu May 10 hmaa la chhuak vek tura inremna an siam thu Maldives foreign ministry chuan a lo puang tawh a ni.