Haiti : Misual rualin airport thunun tumin an bei

Haiti tualchhung buainain ziaawm lam a la pan thei lo a, Thawhṭanni khan Haiti thlawhtheihna ṭum hmun thunun tumin an bei leh. He inbeihnaah hian misual rualte hi sipaite nen an inkap a ni.

Kar hmasa khan misual rualte hian Haiti khawpui, Port-au-Prince-a tan in lian ber an beih avangin tang sang chuang an tlan chhuak a, misual rual hian khaw chhungah buaina an siam chhunzawm avangin Haiti-ah chuan state of emergency puan niin, zan lamah curfew puan a ni bawk. Thawhṭanni khan Haiti-a airport pui ber, Toussaint Louverture International Airport chu lak tumin an bei leh a, beih a nih lai hian airport hi khar niin, thlawhtheihna thlawk tur leh passenger awm loh lai a ni. Haiti-a misual rualte hian khawpui hmun tam zawk hi an thunun tawh nia hriat a ni a, awmze nei zawka hmalakna nei chhoin, Central Bank te pawh an bei ṭan tawh.

Haiti prime minister, Ariel Henry hi Haiti-a UN thlawp sipai thawn luh an nih theih nana inbiakna neiin Kenya-ah a cham mek a, buaina chhuak thunun nan hian ram pawn lam aṭanga puihna an mamawh thu a sawi. Henry hian 2021-a Jovenel Moise thah a nih hnua prime minister hna chelh ṭanin, president emaw, parliament inthlan a la buatsaih leh lo a, hei vang hian nawrh huaihawt niin, nawrh huaihawt a nih hnu hian tharum thawh zawnga chetna hi a thleng chho ta a ni.

Haiti khawpui beitu misual rual hotu hi Jimmy Cherizier, police officer ṭha tak ni ṭhin niin, khawpui beihnaah hian a bul tumtu an nih thu a puang tawh. Cherizier tarlan danin an thil tum chu police hotute zawng zawng leh sorkar minister ni laite hren a, Kenya aṭanga Ariel Henry lo let tur dan a nih thu a sawi.