Israel-Hamas war : Hamas-in Ramadan hmaa inkahhai puan hman ngei duh

Gaza Strip-a Israel-Hamas indona thleng mekah, Palestinian firfiak pawl Hamas chuan Muslim-te thla serh, Ramadan a thlen hma ngeia inkahhai puan a nih hman ngei an duh thu sawiin, hma lak zel an tum tih an sawi.

Hetih lai hian inkahhai puan dan tur ngaihtuaha Cairo-a inbiakna an neih hnuhnung berah chuan Israel aiawhte an tel lo a ni. He hunah hian Hamas, Qatar leh Egypt aiawhte an tel. Kar leh kar tir lam aṭanga Ramadan thla hman ṭan a nih hma ngeia ni 40 chhung inkahhai puang a, inremna siam dan tur an ngaihtuah a ni.

US president Joe Biden chuan Israel-in inkahhai puanna tura Hamas mi hren mekte chhuah an phut chungchang, Hamas lamin an pawm leh pawm lohah a innghat tawh a, inkahhai puang tura inremna siam tur chu Hamas kutah a awm tawh a ni, a ti. Israel rawtna siam chungchangah hian ni thum chhung inbiakna nei tawh mah se, inremna an la siam thei lo.

US enpuina hnuaia rawtna siamah hian, Israel chuan nikum October 7-a Hamas-te'n Israel an beih ṭuma an mi man, tun thlenga an la hren mekte list chu pek leh, an zinga ṭhenkhat chhuah an phut a, Gaza mipuite chhawmdawlna tur tam zawk luhtir an tiam bawk. Hetih lai hian Hamas lam chuan Israel sipaite'n Gaza-a beihpui an thlak tihtawp a, Israel sipaite lak chhuah vek leh, indona avanga hmun danga tlanchhia Gaza mite him taka an khaw lama hawtir leh vek an phut ve bawk. Hamas official Osama Hamdan chuan Israel lam duh dan chu Gaza mi hrente hruai chhuah an nih theihna atana indo titawp lawk chauh a ni tiin, Hamas nuai bo tura an beihpui thlakna chu tawpsan an tum tak tak lo a ni, a ti.