US leh SKorea-in drill an neih vangin NKorea-in beihah a vau

North Korea chuan South Korea leh United States sipaite'n nunchan zirna hun an hman dun chu an ram bei tura an inbuatsaihnaah puhin, sipai tha chakna hmanga beih letah a vau.

North Korea-in vauna a tihchhuah hma hian South Korea leh US chuan kum tina an neih ṭhin, ni 11 chhunga ram pahnih sipaite kawng hrang hranga training-na hun an hmang ṭan a, kumin drill-ah hian kum dang zawng aiin sipaite'n drill exercise an neih tur hi a letin a tam a ni. Hemi chungchangah hian North Korea defence ministry chuan SKorea leh US-in sipai nunchan zirna an nei dun chu an dodal thu leh, ualau taka chutiang an ti ngam chu ram dang tan a hnawksak thu te, ram dang run tura inbuatsaih an nih thu te an tarlang a ni.

Hetih lai hian South Korea defence ministry chuan thuchhuah siamin, US nena sipai nunchan zirna an neih mek chu kum tina ram venhimna lama an tihdan ṭhin pangngai a nih thu leh, NKorea chuan an drill neih lai chu a tibuai a nih chuan na taka an chhan let ve ngei tur thu an tarlang ve bawk.

NKorea ministry pakhat thupuangtu chuan an hmelmate chet dan an enthlak reng tur thu leh, NKorea ram leh a chhehvela an ram tana him lo thei thil reng reng chu uluk taka an vil tur thu a sawi a, eng ang chiahin nge hma an lak dawn sawi lang lo mah se, ralthuam ṭha zawk an neihte pholanna hun remchang zawnga indo an chawh chhuah mai rinna a lian hle. NKorea hian kumin chhungin missile test ṭum ruk zet a nei tawh a, artillery firing drill pawh vawi eng emaw zat a lo nei tawh bawk a ni. NKorea ram hruaitu, Kim Jong Un chuan SKorea nena inremna zawng loa, hun rei tak inremna zawng tura an lo beih tawh pawh chu tihchhiat vek an tum tawh zawk thu a lo sawi tawh a ni.