Trump leh Biden dinhmun a ṭha zel

Kumin kum tawp lama US President thlanna neih tura party presidential candidate chuh zingah, Republican party lamah Donald Trump leh Democratic party lamah Joe Biden te chu an dinhmun a ṭha zel.

Thawhlehni khan party lian pahnih presidential candidate thlanna atana ni pawimawh tak, 'Super Tuesday' an tih chu neih niin Trump leh Biden-te an chak. Kum tawpa President inthlan awm turah an pahnih bawka inkhing leh turin an dinhmun an sawh nghet zel a ni.

Republican party aiawha president chuh tum Trump hian Thawhlehni khan state 15 primary-ah hnehna a chang a, President ni lai leh Democratic party aiawha inthlan chuh tum Joe Biden pawh hneh takin primary-ah hian thlan tlin a ni bawk. Donald Trump hi Republican party-a a khingpui ber Nikki Haley laka a hmahruaina chu a sang tawh hle a, Haley hian President candidate chuh a tumna a bansan mai ringtu pawh an tam tawh hle a ni.

Donald Trump hian Florida-ah thu sawiin a lamṭangte chungah lawmthu a sawi a, a tana zan chhinchhiahtlak tak a nih thu a sawi bawk. Republican party-a a khingpui ber Haley chu campaign nasa hle mah se awmzia a nei lo a ni, a ti. Trump chuan US-a politics vanga tharum thawhna thleng ṭhin chu pawi a tih thu sawiin an rama thleng tura a ngaih loh thil a nih thu a sawi a, an ram chu inlungrual lo tak ni rih mah se, mipui huikhawm leh inlungrualna ṭha an neih leh theihna turin ṭan an la dawn tih a sawi.