Chhinchhiah china February thla lum ber ṭum - February 2024

European Union (EU) hnuaia khawvel sik leh sa dinhmun zirtu pakhat, Copernicus Climate Change Service (C3S) chuan thla liam ta, February 2024 kha chhinchhiah theih china February thla a lum ber ṭum a nih thu an tarlang. February 2024 kha kum 1850 leh 1990 inkara February thla lum ṭhin dan tlangpui aiin 1.77 degree celcius-in a lum zawk a ni.

Scientist-te chuan hetianga boruak lum chhanah hian central Pacific tuipui chung, dan pangngai aia lum, El-Nino vang a nih an rin thu an sawi a, mihringin kan thlen, sik leh sa inthlak vang a ni bawk niin an sawi. C3S hian Paris agreement-a ram hrang hrangin an intiam ang aia nikum chhung zawnga khawvel pum lumna chu a vawi khat nan, 1.5 degree celcius aia nasaa a pun belh thu an sawi bawk. C3S hian nikum chhung khan, thla tina khaw lum dan chu chhinchhiah theih china a lum ber ṭum a ni chho vek bawk niin an tarlang a ni.

February 2024-a khaw lum dan lak rual chu degree 13.54 celcius a ni a, hei hi 2024 hmaa February thla a lum ber ṭum, 2016 February thla aiin 0.12 degree celcius-in a sang zawk bawk.

C3S hian khawvel ram tinin khaw lum belhna chu 1.5 degree celcius aia pung tam lo tura ṭan an lak a ngaih thu an sawi a, khawvel lei chung lang lumna hi 1.1 degree celcius-a sang chho tawhin, hei hi kum 1850-1990 chhoa khawvel pumpui lumna aiin a nasa fe tawh a ni. Hetianga khaw lum chho hi khawkheng, ram kang leh tui liante a thlen fo ṭhin chhan nia an ngaih thu an sawi.