President candidate inchuhna aṭangin Nikki Haley inhnuhkdawk

Kumin kum tawp lama US President thlanna neih tura Repubican party presidential candidate nih tuma an inchuhna aṭangin Nikki Haley a inhnukdawk ve leh ta a, president hlui Donald Trump chu Repubican party president candidate a ni dawn ta.

UN-a US ambassador hlui, Nikki Haley hi Super Tuesday-ah state 15-a primary neihnaah Vermont-ah chauh hnehna changin, a dangah Donald Trump hi a chak vek a ni. Hei vang hian Nilaini khan party president candidate chuh a tumna aṭanga a inhnuhdawh thu a puang zui a, Trump chu party nominee a ni dawn ta tih sawiin, duhsakna a hlan a, mahse, a thlawp thu erawh a sawi lang lo. Trump hian Republican president candiate ni tura delegate neih ngai zat, 1,215 aṭangin delegate 995 a nei tawh a, Haley ai hian delegate hi a let 10 dawnin a ngah tawh zawk. Karleh Thawhlehnia primary neih leh hunah delegate a mamawh zat hi a neih tlin tawh ngei a rinawm.

Democratic party lamah pawh president ni lai, Joe Biden chuan an party president candidate ni tura delegate neih ngai zat, 1,968 aṭangin 1,497 nei tawhin, a dinhmun a ṭha tawh hle. November-a US President thlanna neih turah Biden leh Trump-te an inhmachhawn leh ngei dawn niin a lang.