Houthi helpawlin lawng an bei, mi 3 an thi

Yemen-a inkhuar Houthi helpawl chuan March 6, Nilaini khan Gulf of Aden-a bungraw phur lawng chu missile hmangin a bei a, lawnga chuang mi pathumin an nunna an chan. Helpawlin an beih, M/V True Confidence lawng hi Libya ta a ni.

Houthi helpawl hian nikum November thla aṭang khan Red Sea-a lawng veivakte vawi tam tak beiin tibuai ṭhin mah se tun hi nunna chan an awm vawi khatna a ni.

US sipai chuan thuchhuah siamin, Yemen-a an inkhuarna hmun aṭangin Houthi helpawl hian anti-ship ballistic missile an kah chhuah chuan lawng hi fuhin mi pathumin nunna an chan bakah mi paliin hliam an tuar tih a tarlang. US sipai Central Command chuan,"Khawvel insumdawn tawnna kawng pawimawh tak chu Houthi helpawl avang hian a him lo hle a ni" an ti.

United Nations chuan Houthi-te'n Red Sea-a lawng veivak an beih ṭhin chu titawp turin thu a pe tawh bawk. UN thupuangtu Stephane Dujarric chuan Red Sea paltlang ṭhin lawngte chu an him lo hle tih a sawi.

Houthi helpawl chet dan hi US chuan a enthla reng a, White House press secretary Karine Jean-Pierre chuan Houthi lakah hian US chuan hma a la chhunzawm zel dawn tih a sawi lang ve bawk. US indo lawng Destroyer chuan Nilaini vek khan Houthi helpawl kah chhuah missile leh drone chu an tum a fuh hmain a kap thla. Houthi missile kah chhuah hian USS Carney chu a bitum nia hriat a ni. U.S. military Central Command chuan Houthi drone-te hian bomb an pai tel niin an sawi a, US hian anti-ship missile pathum leh drone pathum an kap thla tih an tarlang.

Houthi pawl thupuangtu, Yahya Saree chuan social media lamah True Confidence lawnga thawkte chuan warning an pek chu an ngaih pawimawh loh avangin missile-in vawi eng emaw zat an kap ta niin a tarlang.