US-in Gaza-ah temporary port a siam dawn

US president Joe Biden chuan tuipui lam aṭanga Gaza Strip-a chhawmdawlna tam zawk thawn luh a nih theihna turin, US sipaite chuan Gaza-ah lawngchawlhna hmun lailawk an siam dawn tih a puang.

Temporary port hi siam a nih chuan, Gaza-a Palestinian-te hnena chhawmdawlna thawn luh ṭhin chu ni tin truck za telin a pung thei dawn niin official-te chuan an sawi.

President Biden hian Ningania State of the Union address a neihah he thu hi a puang a, mahse, he port siamna atan hian kar eng emaw zat hun a ngai dawn a ni. Biden chuan Israel pawhin a tih tur a lo tih ve a ngai a, port siam zawhah hemi kaltlang hian Gaza-a civil mite chhawmdawlna tur tam zawk thawn luh a phalsak a, indona hmunah chhawmdawl hna thawktute an tangkhang lohna tura a lo ngaihtuah a ngai ve dawn a ni, a ti.

Nikum October thla aṭanga Israel-Hamas indona a thlen hnuah, Israel chuan Gaza luhna kawngpuite a dang vek a ni. Mahse hun eng emaw chen Egypt ramri, Rafah crossing leh Israel thununna hnuaia awm, Kerem Shalom kaltlangin chhawmdawlna hi thawn luh a ni. Hetih lai hian World Food Programme (WFP) chuan Gaza hmar lama chhawmdawlna an thawn luh ṭhin an chawl rih dawn tih sawiin, hei hi tualchhunga inrelbawlna mumal a awm loh vang leh,an thil thawn luhte inchuha buaina chhuak ṭhin leh, an thil phurhte ruk a nih fo vang niin a sawi. US-in temporary port siam a tum hi Palestinian National Initiative secretary general, Mustaf Barghouti chuan a sawisel thung a, Gaza Strip dinhmun dik tak thup leh midang rilru hruai pen tumna a ni, a ti. "Gaza hmar lamah mi nuai 7 vel an ṭam mek a, Israel chuan chhawmdawlna pek a phalsak lo a, Gaza Strip hmun dangah pawh an luh a phalsak lo a ni," a ti.