Sweden-in NATO a zawm

North Atlantic Treaty Organisation (NATO) member 32-na ni turin Sweden chuan Ningani khan NATO a zawm. NATO-a Sweden lak luhna hun 'instrument of assession' hi Sweden prime minister, Ulf Kristersson leh US Secretary of state, Antony Blinken te'n an hmang a ni.

Sweden hian indopui pahnihna a tawp hnuah eng pawl mah zawm lo a, neutral dinhmuna a dinna chu 2022-a Russia-in Ukraine a run hnuah an ram tana ṭha lo thei nia ngaiin NATO zawm hi a dil a ni. Sweden-in NATO a zawm chungchangah hian Antony Blinken chuan,"Hei hi Sweden tan mel lung pawimawh tak a ni a, NATO tan pawh hun chhinchhiahtlak a ni. Atlantic tuipui chhehvela ram awmte inlaichinna chungchangah pawh hun pawimawh bik a ni. NATO chu a chak sawt a, tun hma zawng aiin a lian ta bawk a ni" tiin a sawi.

NATO hi Atlantic hmar lam tuipui chhehvela ram hrang hrangte sipai tha chakna hmanga an inzawm khawmna a ni a, khawvela mahni ram venhimna hna thawk tura inzawm khawm lian ber leh chak bera ngaih an ni. Sweden-in NATO a zawm tak avang hian NATO pawh chak leh zual tura ngaih a ni. Tun dinhmunah Sweden hian sipai 14,600 leh reserve 10,000 a nei a, tank 120, submarine 5, aircraft 96 leh ralthuam eng emaw zat a nei bawk.

Sweden-in NATO a zawm tur hi NATO member tho, Turkey leh Hungary-te chuan hun eng emaw chen an dang a, Turkey hian Sweden chu Turkey-in helpawla an puan Kurdish group laka hma la ṭha loa an ngaih vang niin, Hungary erawh hi chuan Russian ṭan zawng rilru a put avanga NATO-in Ukraine a thlawpna a ṭawmpui theih loh vang a ni thung. Hetih lai hian Turkey hian kumin kum tir khan Sweden-in NATO a zawmna tur hi a pawm a, Hungary pawhin tun kar tir khan an ram parliament-ah vote lain Sweden-in NATO a zawm hi a remti ve leh a ni.