North Korea-in a ralthuam enchhinna a nei

North Korea state media chuan an ram sipaite'n ralthuam enchhinna an neih thu nimin khan an puang a, an ram hotupa Kim Jong Un chuan ralthuam enchhinna hi a hmunah a telpui a ni. Hei hi US leh South Korea sipaite'n intuaihriamna hun an neih chhan letna niin an tarlang.

Korean Central News Agency, North Korea chuan artillery firing drills an neih thu hi tarlangin South Korea khawpui, Seoul pawh an kap pha tih an sawi lang. Kim Jong Un chuan an artillery unit chu fuihna hun neiin an tihchhinna chu indona tak tak anga ngai turin a chah bawk.

South Korea Joint Chief of Staff chuan nimin khan an ram aṭanga khawchhak lam tuipui chu North Korea-in ralthuam enchhin nan an kap tih an hriat thu a sawi. Hetiang inchona hi South Korea chuan a ngawih bopui dawn lo tih sawiin, an chhang let ve ngei dawn a ni, a ti. North Korea hi US leh South Korea-in Thawhṭanni aṭanga ṭan, military exercise an neih avangin an lungawi lo hle a, an ram himna a tiderthawng niin an ngai a ni. US leh South Korea erawh chuan invenna atan sipai intuaihriamna hun hi an nei niin an sawi thung.

North Korea hian kum 2022 aṭang khan missile enchhinna ngawrh lehzualin a kalpui a, an ram aṭanga US kap pha nuclear pai tel missile neih vat a tum. North Korea lakah hian US chuan hrekna a siam mek avangin ralthuam enchhin leh tihchangtlun kawngah North Korea hian ṭan a la niin mi thiamte chuan an ngai.