Israel beihna avangin Lebanon mi 5-in nunna chan

Lebanon-a inkhuar, Hezbollah leh Israel inbeihna chuan ziaawm lam a la pan hlei thei lo. Israel leh Hamas indona ṭan a nih hnu khan, Hamas lam ṭang, Hezbollah helpawl leh Israel hian indona an ṭan ve nghal a, Israel leh Lebanon ramriah inkahna a thleng reng a ni.

Lebanon National News Agency chuan March 9, Inrinni khan Lebanon chhim lama inkahna thleng avangin mi pangain nunna an chan tih an tarlang a, hemi bakah hian midang pakuain hliam an tuar bawk. Israel-in Khirbet Selm hmuna in pakhat an kah fuh avangin a chhunga chengte chuan nunna an chan niin an tarlang.

Hamas leh Israel-te'n October 7-a indona an ṭan hnu lawkah, Hezbollah lam hian Israel hi an kap ṭan ve nghal a, hemi avang hian mi 312-in nunna an chan tawh ni a hriat a ni. An zinga a tam ber chu Hezbollah helpawl mi leh sa niin, civil mi 56 an tel. Israel lamah hian sipai 10 bakah civil mi pasarihin nunna an chan tawh nia tarlan a ni ve bawk.

Netanyahu hian hma a la ṭha tawk lo : Biden

US President Joe Biden chuan Israel prime minister Benjamin Netanyahua'n Gaza-a Hamas beihna kawnga hma a lak dan chu Israel tan ṭhatna aiin ṭhat lohna a tam zawk nia a hriat thu a sawi.

President Biden chuan Israel-in Hamas-te'n October 7-a an beihna a chhang let chu a pawmpui tih sawi mah se, pawisawi lo nunna chan an tlem theih nan Israel chuan hma an lak a ngai nia a hriat thu a sawi. Biden hian Israel-in Rafah beih a tumna chu a ṭha a tih loh thu sawiin pawisawi lo nunna tam takin a tuar dawn a ni, a ti. Heti chung hian Israel an thlawpna chu tihtawp a tum chuang lo tih a sawi zui a, Israel-in missile laka invenhim nana an hman, Iron Dome an pek ṭhin pawh an titawp dawn lo tih a sawi bawk.