UNSC-in Sudan-ah inkahhai puang turin a duh

United Nations Security Council (UNSC) chuan Muslim-te hun serh, Ramadan lo thleng tur avangin, tualchhung indona thlen mekna, Sudan-ah inkahhai puang se an duh tih an sawi.

UNSC chuan Sudan-ah hian inkahhai puan a nih chuan ei tur mamawh taka awm tawh, mi nuai 250-te tan chhawmdawlna pek theih an beisei thu an sawi a ni.

Sudan-a inkahhai puan hi UK chuan pu lutin, member dang 14-in an thlawp a, Russia erawh chuan inbiakna neia inremna mumal tak neih a duh zawk thu a sawi. Sudan tualchhung indona avang hian mi sang chuang an thi tawh a, raltlan maktaduai 8.3 chuang an awm tawh bawk. UNSC-in resolution an pawmah hian khawvel puma Muslim-te thla serh lo thleng tur avang leh, he hun serh zahna lantir nan hian inkahhai hi puan rih ni se an duh thu an tarlang. Sudan-ah hian ṭanpuina leh chhawmdawlna thawn luh theih ngei ni se an duh thu an tarlang bawk.

Sudan-ah hian April 15, 2023 aṭang khan tualchhung indona chhuakin, General Abdel Fattah al-Burhan-a kaihhruai army leh General Mohamed Hamdan 'Hemedti' Dagalo kaihhruai, paramilitary, Rapid Support Froces (RSF) te chu rorelna inchuhin an indo a ni. Indona hi a la reh loh avangin UNSC hian Ramadan laia inkahhai puan an duhna resolution hi an pass a, UK deputy ambassador, James Kariuki chuan Sudanese Armed Force leh RSF te chuan inremna kawng zawng a, sakhaw hun serh zah tur leh, chhawmdawlna thawn luh a nih theih nana remti tura a duh thu a sawi a ni.