Tui lian leh leimin avangin Indonesia-ah mi 19 thi

Indonesia province pakhat, West Sumatra chuan ruah sur nasa avangin harsatna an tawk nasa hle a, nimin thleng khan ruah sur kaihhnawih chhiatna thleng avangin mi 19-in nunna an chan tawh.

Ruah sur nasain a thlen, tui lian leh leimin avangin Indonesia hian kar liam ta Ningani aṭang khan buaina an tawk ṭan a, mi 70,000 chuang an chenna hmun aṭangin thiar chhuah an ni tawh. Tui lian leh leimin hian in 700 chuang tichhe tawhin, sikul, lei (bridge) leh leilet tam tak a tichhe tel a ni.

Chhanchhuah hna thawktute chuan ngawrh takin mi zawn hna thawk mah se, leimin leh tui lian avang hian kawngpui ṭhenkhat dan a ni a, chhanchhuah hna hi an duh angin an thawk chak thei lo a ni. Abdul Malik, Provincial rescue team hotupa chuan tunah dinhmunah chhanchhuah hna thawktu mi 150 vel an awm thu a sawi. An mi thiar chhuahte chu dahna mumal a la awm loh avangin Mosque-ah dah lailawk an ni. Khawchin thlirtute'n ruah hi ni enge maw zat a la sur dawn nia an sawi lawk avangin disaster agency lam chuan tui lian leh leimin avanga chhiatna nasa zawk a thlen a hlauhawm tih an sawi.