Palestinian thi zingah firfiak 13,000 an tel : Netanyahu

Israel prime minister Benjamin Netanyahu chuan Pathianni khan Gaza Strip-a Israel-in Hamas laka beihpui a thlaknaa thi zingah, firfiak pawla mi, 13,000 vel an tel tih a sawi.

Nikum October 7-a Hamas-te'n Israel an beih hnuah Israel-in Gaza Strip-a Hamas-ho lakah beihpui a thlak zui ve nghal a, thla nga chhung Gaza Strip-ah hian indo tawhin, hemi chhung hian Palestinian mi 31,000 vel an thi tawh nia sawi a ni.

Prime Minister Netanyahu chuan Gaza chhim lama beihpui thlak an tum chu ram hrang hrangte'n kalpui lo turin ngen mah se, Hamas firfiakte nuai chimit turin beihpui thlak ngei an tum thu a sawi nawn leh.

Indona avanga Gaza Strip-a Palestinian thi zingah hian civil mi leh Hamas firfiak zat chu Gaza health ministry chuan a sawi lang lo a, mahse, thi zingah hmeichhia leh naupang ṭhahnem tak an awm tih erawh a sawi. Israel-in firfiak thi zat nia a sawi chu Hamas lam chuan thu dik lo niin an sawi bawk.

Netanyahu chuan Hamas-ho nuai chimit tur chuan Gaza chhim lam, Rafah-ah beihpui an thlak chhunzawm ngei a ngai tih a sawi a, "Hnehna kan chang dawn hnai tawh. Rafah-ah eng hunah nge beihpui kan thlak ang tih chauh a ni tawh," a ti. Ram hrang hrang, US ngei pawhin Rafah-a beihpui an thlak tum hi ngaihtuah ṭha leh turin ngen mah se, Netanyahu chuan Hamas battalion hmun lia ṭhena hmun thum an tichhe tawh a, an chawlhsan leh mai chuan firfiakte intuaithar lehna hun an siamsak zawk mai mai dawn niin a sawi.