US-in Haiti aṭangin an mi leh sate an la chhuak

Misual rualin an khawpui beia buaina nasa tak a chhuah avanga state of emergency-a awm mek, Haiti rama an embassy aṭangin thawktu eng emaw zat an lak chhuah thu leh, embassy venhimna tura sipai an thawn luh belh thu United States military chuan an sawi.

US hian Haiti-a an embassy-a thawktute hi thlawhtheihna hmangin an la chhuak a, thawktute lak chhuah leh sipai tirh luh hi khawvel hmun dangah pawh an embassy leh thawktute himna atana an tihdan ṭhin a nih thu an tarlang.

Haiti ramin state of emergency an puan lai hian an prime minister Ariel Henry chu an rama UN mission sipai dah tur, hun rei tak tihkhawtlai tawh a inremna chungchangah Kenya-ah a awm mek a, Kenya hi Haiti-a UN thlawp sipai kaihruai tura beisei niin, an ram dan leh hrai eng eng emaw avangin hma an la la thei lo a ni. Haiti ram a buai mek bawk avangin US state department chuan US secretary of state, Antony Blinken leh Kenya president, William Ruto te chuan Haiti dinhmun thlir chunga, a rang lama buaina tireh tura thawhhona a awm thuai theih an beisei thu an sawi tih an tarlang bawk.

Haiti-ah hian Pathianni hmasa khan state of emergency puan a ni a, hei hi an khawpui, Port-au-prince-a misual rualin sorkar paih thla tura buaina chawk chhuaka khawpui hmun hrang hrang an bei leh, tan in aṭanga tang mi sang chuang an tlan chhuah vang a ni. Sorkar paihthlak tuma buaina siamte hi G9 Haitian gang intiin, Jimmy Cherizier chu an hotu a ni. Prime Minister Henry hian banna a theh lut lo a, ram dangin an thlawp zel a nih chuan civil war an chawh chhuah tur thu a lo sawi tawh a ni.