Congo-ah sipai leh helpawl indona vangin mipuiin harsatna tawk

Central Africa ram pakhat, Congo chuan a ram khaw chhak lamah buaina thar lam a hmachhawn leh mek a, mipui tawrhna a thlen hlauthawngin khawvel ram hrang hrangte'n an ngaihven hle. Buaina hi Congo sipai leh helpawl pakhat M23 (March 23) inkara chhuak niin, hmun tam takah inkahna thlen avangin nunna chan an tam tawh hle.

Congo-a sipai leh helpawl inkar buaina hi kar liam ta aṭanga inṭan tawh niin thi leh hliam tam tak awm tawhin mi sang chuangin an chenna hmun an tlanchhiatsan bawk a ni. North Kivu province chhunga Sake khua chu buaina bul ṭanna hmun nia hriat a ni. Helpawl lam hian kar liam ta khan Nyanzale khua chu an thuhnuaiah an dah tawh a, he khaw lak tuma an inbeihna avang hian mi 10-in nunna an chan a ni.

M23 helpawl hi Congo ram ṭhenawm, Rwanda chuan a thlawp avangin ram pahnih inkar boruak pawh a sosang hle. US chuan Congo leh Rwanda chu indo pumpelh hram tum turin a chah a, Rwanda chu Congo ramchhunga missile leh sipai a tirh luh la chhuak turin a ngen. UN leh khawthlang ram dangte pawhin M23 chet dan chu an dem thu tarlangin sipai an beihna chu titawp tura an duh thu an sawi bawk.

Tualchhung buaina thleng mek hian ram pahnih mipuiteah nghawng na zawk a neih a hlauhawm hle a, Congo hi tuilian tuar zo chauh an nih avangin mipuite tawrhna a thuahhnih hle a ni. Rwanda leh Congo hi an indo a nih chuan mi maktaduai chuang chu rilṭama an awm dawn thu tarlan a ni a, hetiang an pumpelh theih nan hian khawvel ram dangte chuan hma an la mek a ni.