Brazil President-in a VP phatsantu niin a puh

Brazil President Dilma Rousseff chu Congress-in president a nihna aṭanga ban a nih dan tur a ngaihtuah dawn ta a, hetihlai hian President chuan a vice president ichel Temer chu phatsantu leh paihthlak a nih theihna atana phiarrutu-ah a puh.

Congresssional committee-in Congress-ah President Rousseff-i banna tur chungchang ngaihtuah remtih a nih hnuah, Vice President Temer hian president paihthlak a nih huna a thlaktu atana lakluh a nih huna thu a sawi dan tur alo zir lawkna audio message chu a put ru a ni.

Brasilia-a thu a sawina-ah, President Rousseff-i chuan, "Hun danglam takah kan cheng a, thuneihna inpaihthlak sak tumna hun te, lemchan leh midang phatsan hunte kan tawng a ni" a ti. Temer-a thusawi putru chungchang pawh sawichhuakin, phatsantute nihna dik tak chu pholan a ni ta a ni, a ti. Temer bakah lower house speaker Eduardo Cunha chu phatsantuah a puh bawk. "Mipuiten an aiawh tura an thlanchhuahte paihthlak tuma phiarrutu an ni a, democracy zahna reng reng an nei lo" tiin a sawi.

President banna tur chungchang hi Zirtawpni aṭang hian sawiho a ni ang a, Pathianni-ah vote lak a ni ang. Congress-ah hian member hmun thuma ṭhena hmun hnihin ngaihtuah an remtih chuan Senate-ah thawn a ni ang a, Senate hian thutlukna a siam dawn a ni.

Rousseff-i kaihhruai ṭangrual sorkar thlawptu party lian ber zinga mi, Progressive Party chuan sorka an thlawpna an hnukdawk tawh a, vote lak hunah pawh an member 47 te chuan President bantir duh lamah an vote dawn tih an sawi.