Panama paper leak : Mossack Fonsecka hqrs an dap

Panama rama inkhuar, Mossack Fonseca law firm tax document tam tham tak put aṭangin chhiah awlruk duh vanga mi hausaten ram danga sum an chheprel chungchang hriatchhuah a ni a, an zingah hian politician leh ram hruaitu ni lai mekte hming pawh a lang tel. 

Mossak Fonseca firm chuan tih dik loh engmah a neih loh thu leh, an document chu a leak ni loin ram pawn lam server aṭangin an hack sak vang zawk niin a sawi. 

He thil thlen hnu hian Panama President Juan Carlos Varela chuan ram pawn lama financial industry kalpui≠naah langtlanga thil tih a nih theihna turin ramdang≠te thawhpui a tiam a ni. 

Panama Police-te chuan Thawhlehni khan crime unit official-te nen firm headquarters hi an dap a, document pawimawhte an zawng a ni. Attorney general office chuan he thil an tihchhan chu chanchinbu-a firm-in dik lo taka thil a tihna nia sawi,  document tarlante nena inzawmna nei thilte an zawng niin a tarlang. Firm headquarters bakah hian a office peng dangte pawh an la dap dawn tih a sawi bawk.

Mossack Fonseca tax document maktaduai 11 chuang zet a putruh hnu hian Panama sorkar chuan a chhui chiang dawn tih a lo sawi tawh bawk. Document-a hming langte awmna ram eng emaw zat chuan hemi chungchang hi an chhui mek bawk.