Iraq parliament-in PM cabinet rawtna a hnawl

Iraq parliament chuan Prime Minister Haiderl al-Abadi-an a cabinet thar tur list a thehluh chu parliament member tam takin an duh lo a, vote lak hun tur pawh sawn a ngaih phah.

Abadi hian Thawhlehni khan parliament-ah a candidate list hi a thehlut a, mahse a nominee-te hi Sunni leh Shia block member-te chuan duhloin, meeting hall-ah lungawi lohna an lantir zui nghal a ni.

PM-in cabinet list a thehluhah hian mi 15 hming a lang a, March 31-a list a lo siam tawh zinga mi pali chauh an lang chhunzawm a ni. Cabinet siksawi hi PM-in eirukna do tur a hma a lakna tur peng pakhat niin a sawi. Cabinet hi siksawi a nih loh chuan sorkar a che chak thei dawn lo a, Iraq sipaiten Islamic State (IS) firfiak pawl kut aṭanga an ram hmarlam khawpui, Mosul lak let tuma beihpui an thlak mekah pawh nghawng a nei a hlauhawm hle nia sawi a ni.

Iraq tlawha zin, US Secretary of State John Kerry chuan Iraq chu politics lama a buaina tawh mek chu IS firfiakte a beihna kawngah nghawng neih tir lo turin a ngen a, PM Abadi chu a thlawp thu a sawi bawk.