Pakistan President-in First Lady atan a fanu ruat

Pakistan president, Asif Ali Zardari chuan a fanu naupang ber, kum 31 mi, Aseefa Bhutto chu an ram First Lady atan a ruat.

Tih dan ṭhanah chuan President nupui hi First Lady an ni ṭhin a, mahse, Zardari hi kum 2007-a a nupui, prime minister hlui, Benazir Bhutto thah a nih hnu khan nupui dang nei tawh loin a awm a ni. Hei vang hian kum 2008-2013 chhunga Pakistan President a nih lai pawh khan an ram hian First Lady an nei lo a ni.

Pathianni khan kum 68 mi, Zardari hi Pakistan President 14-na atan lak luh a ni leh a, he hunah pawh hian a fanu Aseefa hian a ṭawiawm. First Lady a nih thu official-a pawm a nih hnuah, Aseefa hian First Lady-in hamṭhatna leh venhimna a dawn ṭhin ang chu pek a ni dawn a ni.

Aseefa hian kum 2020, November 30 khan politics luhchilhin, kumin February thlaa an ram inthlanpui neihah pawh khan Pakistan Peoples Party (PPP) tan a ṭangkai hle a, a nuṭa, Bilawal Bhutto Zardari tan hmun hrang hrangah rally pawh a nei a ni.

Ram dangah pawh President, nupui nei lote chuan an fanu, farnu leh an tunute first lady atan hian a lo ruat tawh ṭhin a ni. US president hlui Andrew Jackson khan a tunu, Emily Donelson chu First Lady turin a ruat a, president hlui dang pahnih - Chester Arthur leh Grover Cleveland-te pawh khan an farnu-te chu First Lady turin an lo sawm tawh bawk.