Ukraine-in USD tluklehdingawn khat aia tam mamawh : UN agency

United Nations’ cultural and scientific agency chuan Russia nena kum hnih chhung zet an indo tawh avanga Ukraine rama scientific infrastructure tam tak chhiate din thar lehna atan USD tluklehdingawn khat chuang a mamawh dawn tih a sawi.

UNESCO chuan report a tihchhuah tharah hei hi tarlangin, indona avang hian Ukraine-a scientific facility 1,443 a chhe tawh a, heng zinga tam tak hi univeristy-a mi an ni tih a sawi. Technical equipment 750 vel chhe bawkin, hengte hi siam ṭhat tlak tawh loh khawpa chhia an nih thu a tarlang.

Report chuan Ukraine chhimchhak lam, Russia awpna hnuaia awm mek, Zaporizhzhia nuclear power plant bula Institute for Safety Problems of Nuclear power plants chu ngaihven a ngai hle tih a tarlang. He institute-a nuclear industry endikna hmanraw pawimawhte chu ruk bo leh tihchhiat an ni a, hei hi Ukraine bakah a chhehvel ram tan pawh a him lo hle a ni, a ti.

Indo hma khan Ukraine hi khawvel huap pawha computer science, nuclear physics leh astronomy lama thawhhlawk tia hriat ṭhin an ni. Russia nen an indo aṭangin kum thumna a ni tawh a, science sector lam pawh a nghawng nasa tawh hle. Public research sector-a thawk, scientist 10,429-te chu himna zawngin an tlanchhia a, an zingah 5,542 chu ram dangah an tlanchhia a ni. Indo hma khan Ukraine sorkar hnuaia scientist hna thawk hi mi 88,629 an tling hman a ni.