"Russia hi nuclear indona nei turin a inpeih tawh" - Putin

Russia president, Vladimir Putin chuan Russia chu indo tura inpeih renga a awm thu leh, nuclear indona hmachhawn tura a inpeih thu sawiin, tun dinhmunah erawh nuclear indona lam hawia thil a kal rih loh thu a sawi.

Putin hian Russia-a chanchinthar la khawmtute a kawmnaah he thu hi sawiin, an ram inrelbawlna leh thuneihna tiderthawng thei a awm a nih chuan nuclear ralthuam hman chu an inpeih reng tih a sawi a ni. "Sipai leh ralthuam dinhmun aṭanga thlirin nuclear indona hmachhawn turin kan inpeih a ni. US hian Russia huam chhung (Ukraine pawh tiamin)-a a sipai a dah a nih chuan Russia chuan kan ram inrelbawlnaa inrawlhah a ngai dawn tih hi US pawhin a hrethiam a ni. Russia leh US inlaichinna chungchangah hian mithiam tam tak thawktu an awm a, chuvang chauh chuan nulcear ralthuam hmanga indona lam hi kan hawi thut thut rih lo zawk a ni" a ti.

Russia hian March 15-17 hian president thlanna an nei dawn a, Putin hi chak leh ngei tura beisei a ni. Nuclear ralthuam hman chungchanga a ngaihdan hi Putin hian Kremlin nuclear doctrine-a a tarlan tawh thu sawiin,"Ralthuamte hi hman tur atana awm an ni a, mi tinin ngaihdan kan nei bawk a ni. US hian nuclear ralthuam a enchhin a nih chuan Russia pawhin a enchhin ve mai ang. Thil ṭul a ni kher lo a, mahse, ngaihtuahna hmang chungin kan ti ve lo ang tih pawh a sawi theih chuang loh" a ti. Putin hian February 2022 aṭanga a beih tawh, Ukraine chungchangah, Ukraine nena an indonaah nuclear ralthuam hman ṭulna an la neih loh thu a sawi bawk a ni.