Japan : Private sector siam rocket kah chhuah hmasa ber a puak

Japan khawpui, Tokyo-a hmunpui nei, Space One chuan Nilaini khan Japan-a private sector rocket siam hmasa ber kap chhuakin, van sang a thlen hmain rocket hi a puak.

Space One rocket siam hi a hmingah Kairos tih a ni a, central Japan-a Wakayama province aṭangin kah chhuah a ni. Kairos hian khawvel hel tur satellite a keng a, satellite dah chho tura ruahman a ni. Mahse, kah chhuah a nih hnu lawkah hian a puak a, thi leh hliam erawh an awm lo niin an tarlang. Kushimoto khawpuia fire department chuan rocket puak avanga lei lama kangmei chhuak pawh a nasat hmaa an ṭhelh theih thu an sawi. Kairos kah chhuah lai hi NHK broadcaster-te chuan live-in an pe chhuak a, live video-ah hian rocket puak lai hi a hmuh theih a ni. Rocket puah chhan hi hriat a la ni lo a, chhui zui nghal a nih thu NHK-te hian an tarlang.

Kairos kah chhuah hun tur hi ṭum eng emaw zat tihkhawtlai a lo ni tawh a, kar liam ta Inrinni khan kah chhuah tum ni tawhin, hemi ṭum pawh hian chhiat tawh thila hlauhawm phakah lawng pakhat a lo awm avangin kah chhuah tum chu ṭhulh a lo ni tawh bawk a ni. Space One hi 2018-a din a ni a, Japan-a private company, khawvel pawn lama kal leh zir chiannaa hma la hmasa ber an ni. Japan-ah hian sorkarin Japan Aerospace Exploration Agency (JAXA) hmangin khawvel pawn zirnna leh a kaihhnawihah hma a la ṭhin a ni.