Republican Presidential candidate ni turin Trump a tling

Donald Trump chuan Republican party aiawha US President inthlan chuh a tumna chu a hmawr a bawk ta. Georgia, Mississippi leh Washington state-a hnehna a chan hnuah, Republican palai vote 1,215 a hmuh tlin nghal avangin US President nih inchuhin Joe Biden nen an inkhing leh dawn a ni.

Trump hian kum 2020 inthlanah khan Joe Biden a hneh loh avangin White House a chhuahsan a ngaih phah a ni. Kum 2020 inthlana hnehna a chang lo hi pawm thiam harsa a ti hle a, puhmawh tur hrang hrang a zawn bakah dik lo taka thil a tih avanga chakah Biden chu puhin court-ah hial a zualko a ni. Kumin kum tawpa Biden nena President nihna an inchuh leh tur pawh hi a vawi hnihna tur ni mah se, boruak a sang hle. Trump hian President awm tawh zinga a chhe ber an hrawn mek avangin hnathawh nghal char char a ngai tiin hun khawh ral thei an nih loh thu a sawi a, President Biden chu a rawn bitum nghal chat a ni. AP-NORC Center for Public Affairs-in poll an buatsaihah American mi za zela 38 chuan Trump hi President a nih leh an rin laiin Biden a chak leh ringtu hi mi za zela 41 an awm tih an tarlang.

Donald Trump hi Republican aiawh tura thlan tlin ni tawh mah se thubuai tam tak a laka ziah luh a awm avangin buaina hian a kiansan mai dawnin a lang lo thung. A thubuaite hi New York-a pawisa tihchingpen chungchang bakah 2020 inthlan result a dodal kawnga a chet dan leh President a nih laia document pawimawh tihchingpen vangte an ni. Trump hian thiam loh a chang a nih chuan lung ina a tan a ngaih dawn bakah kum tawp inthlan result-ah nghawng a neih a hlauhawm a ni.