Rohingya raltlante tan USD mtd. 850 aia tam mamawh a ni : UN

United Nations chuan Bangladesh-a Rohingya raltlan awm mekte tana ṭanpuina sum a khawn mekah, USD mtd. 850 aia tam mamawh a nih thu a sawi.

UN hian Rohingya raltlante tan hian ei tur leh thil dang bakah, heng raltlante lo dawngsawng a an awmna tur lo siamsaktu, Bangladesh mipuite ṭanpui nan hian USD mtd. 852.4 mamawh a nih thu a sawi a ni.

Kum 2017-a Myanmar-a tualchhung buaina a chhuah avanga Myanmar mipui raltlan zingah, Rohingya, a tam zawk Muslim-te chu Bangladesh-ah hian an tlanchhia a, tun dinhmunah Bangladesh-ah hian Rohingya raltlan hi maktaduai khat chuang an awm mek nia hriat a ni.

UN High Commissioner for Refugees (UNHCR) chuan raltlan zinga 95% vel hi ṭanpuina peka innghat tawp an nih thu an tarlang. UNHCR hian Bangladesh-a Rohingya raltlante tana ṭanpuina sum mamawh zat chungchangah hian thuchhuah siamin,"Khawvel beng hriatah he buaina thawm hi a reh tak deuh avangin ṭanpuina lut pawh a tlahniam a ni. Myanmar hi a la buai chhunzawm reng a, hei vang hian raltlante hian ṭanpuina an la mamawh reng a ni. Raltlan tam zawkte hian ni tina an mamawh pawh an nei thei lo," tiin an tarlang.

Bangladesh-a Rohingya raltlan, refugee camp-a awm zinga a zahve aia tam hi kum 18 hnuai lam an ni a, ei leh bar zawnna atana an thiam tur thil bakah zirna leh thiam thil nei tura an chanvo thlengin an nei thei lo a ni. UNHCR chuan ṭanpuina sum chu raltlante mamawh; ei tur, tui, inenkawlna, venhimna leh zirna atante hman a nih tur thu an sawi. UN hian Rohingya raltlante tan hian nikum khan ṭanpuina a lo khawn tawh bawk a, khawvel ram hrang hrangte chu USD mtd. 876 mamawh a nih thu hrilhin, USD mtd. 440 chiah a khawn chhuak thung a ni.