Kim Jong-un-a'n battle tank thar a khalh

North Korea ram hotu lu ber, Kim Jong-un chuan Nilaini khan an ram sipaite'n mock battle an neihnaah enpuiin, an tank thar a khalh.

Mock battle, training match an tih hi tank crew-te theihna enchhina atana tih ni bawkin, mission harsa leh hautak tak hmachhawn tura an inzirtirna a ni nghal a ni. Mock battle-ah hian 105th Tank Division chu pakhatna an ni a, anni hi Korean War laia South Korea khawpui Seoul awptu kha an ni.

Kim-a'n mock battle a enpuinaah hian defence minister Kang Sun Nam leh senior official-te'n an ṭawiawm a ni.

North Korea ramin a ngaihmawh tak, a ṭhenawm South Korea leh US-in joint annual drill an neih chu nimin khan an zo. He drill hi Freedom Shield exercise tiin an vuah a, kar liam ta chhung khan Pocheon-ah ram pahnih sipaite hian live fire exercise an nei. He hunah hian tank, armoured car leh FA-50 fighter jet te an hmang. NKorea chuan SKorea-US joint military drill hi na takin a sawisel a, indo tura an inbuatsaihna niin a puh a, drill an neih chhung pawh hian a chhan letna atan missile pawh enchhin pawh a nei a ni, kar liam ta pawh khan Kim enpuina hnuaiah an ram sipai, Korean People's Army chuan artillery firing drill an nei. NKorea state media, KCNA chuan an artillery-te chuan an hmelmate khawpui a kap pha niin a sawi zui.