UK-ah ram dang sorkarin chanchinbu an neih phal lo

United Kingdom chuan ram dang sorkarte'n Britain chanchinbua thu an neih phal a nih loh tur thu Nilaini khan a puang. Hei hi tun hnaia UK ram chhunga chanchinbu lar tak pakhat, Telegraph Media Group neitu nihna ram dang mi kuta hlan a nih hnua puan a ni.

Media Minister Stephen Parkson chuan House of Lords-ah he thu hi a puang a, hetiang hmalakna avang hian democracy ken tel pawimawh tak, thuthar thehdarhtute zalenna chu a him lehzual dawn niin a sawi. Sky News hotupa Andrew Neil chuan sorkar hmalakna chu ṭha ti hle mah se, an tlai hreta a hriat thu a sawi ve thung.

UK-a chanchinbu lar tak Daily Telegraph chanchinbu neitu nihna chu Sheikh Mansour bin Zayed Al Nahyan-a company chuan nikum November khan a lei avangin Britain rama chanchinbu lama thawktute chuan an sawi zui nasa hle. Hemi avang hian UK sorkar pawhin chanchinbu neitu nihna hralh a nih dan hi chhui chianna an nei nghe nghe a ni.

Chanchinbua neitu nihna, ram dang mi kuta hlan phal lohna dan siam thar a nih chhan pakhat chu Telegraph hralh vang a nih thu sorkar thupuangtu pakhat chuan a sawi. An dan siam thar chu kar leh lama ngaihtuah tur Digital Markets, Competition and Consumers Bill put luha tel tur a nih thu sawiin, dan thar chu hman ṭan a nih ṭep tawh thu a sawi bawk.