Israel beihna avangin Gaza-ah Palestinian nunna chan an pun belh

Gaza health ministry chuan Ningani khan Israel-in Gaza strip chu ṭum hnih an rawn bei leh tih an tarlang a, mi 29-in nunna an chan niin an sawi.

Palestinian lam chuan Israel hian ṭum hnih a bei nia sawiin, a hmasa zawkah central Gaza Strip-a Al-Nuseirat camp airstrike hmanga beih a ni a, mi pariatin nunna an chan niin an sawi. A ṭum hnihna erawh silai hmangin mipui pung khawm chu beih niin mi 21-in thih phah a ni, an ti. Thuchhuahah hian mipuite hi chhawmdawlna phurtu lirthei nghaka pung khawm an nih thu tarlan a ni bawk.

Israel lam chuan Palestinian puhna chu thu dik tawk lo a nih thu an sawi ve thung a, thuthar theh darhtute chu thu rintlak chauh theh darh turin an ngen bawk. Israel sipai thuchhuah chuan Israel Defence Force (IDF) lamin thil thleng chu an chhui chian mek thu leh, ṭanpuina pek chhuahna hmun an beih loh thu an sawi.

Ningani vek khan central Gaza, Deir Al-Balah-a in pakhat chu Israel missile kah chhuahin a fuh avangin mi pakuain nunna an chan bawk niin Palestinian lam chuan an tarlang

Hamas-in inkahhai puan rawtnaa theh lut

Palestinian firfiak pawl, Hamas chuan Israel nena an indo mek karah inremna a awm theihna tura palai hna thawktu leh US aiawhte hnenah, inkahhai puanna tura rawtna an siamte a theh lut.

Hamas-in rawtna a siamah hian Israel-a Palestinian mi, jail tang mekte leh Israel mi an hren mekte inthleng tawnna a tel a, Palestinian chhuah tura an phut zingah hian dam chhung tang tura thiam loh chantir mi 100 an tel. Rawtna an thlenah hian Israel mi an hren mek zinga hmeichhia, naupang, kum upa leh dam ṭha lote chhuah a, hemi chhan letna atan Israel-in Palestinian mi tang 700 - 1000 an chhuah an phut.

Gaza Strip-a inkahhai puang tur hian palai hna thawktute hmalaknain inbiakna neih fo ni mah se, an la tihlawhtling thei lo a, Israel chuan Hamas-ho thil phut hi an pawmsak lo ṭhin a ni. Tun ṭuma Hamas rawtna siam thar chungchangah hian Israel lam chuan chhanna an la pe lo thung.