US house of representatives-in TikTok khapna bill an pass

United States-a TikTok khap theihna tur bill chu house of representatives-ah vote 352 hmuin pass a ni. US hian TikTok chu ram venhimna kaihhnawihah an ram tana pawi thei a nih thu sawiin, China leh big tech dan nana an hmalakna niin tarlan a ni bawk.

TikTok khapna bill hi member 100 awmna, house sang zawk, house of senate-ah ngaihtuah leh a ni dawn a, president Joe Biden pawhin bill hi pass a nih chuan a hming ziah hnana, a pawmpui nghal tur thu a sawi ve bawk. Senate-a pass a nih a, President-in a pawmpui bawk chuan, TikTok neitu, China company ByteDance chu US-a TikTok kaltlanga investment an neih zawng zawng la chhuak turin thla ruk hun pek an ni ang a, hei hi an ti thei lo a nih chuan TikTok hi US-ah khap a ni dawn a ni. ByteDance hi China sorkar nena inzawmna neia thawk duna hriat a ni a, heta ṭang hian US sorkar official-te chuan an rama TikTok hmangtu, mi mtd. 170 chuangte data chu ByteDance hian an la khawma an hriat thu an sawi a ni.

Hemi chungchangah hian, US aiawh, Cathy McMorris Rogers chuan TikTok chu duhthlanna felfai tak siam tur a kawh hmuh thu a sawi a,"TikTok hian an parent company, ByteDance aṭanga an inlak chhuah chauhin US-ah hian hman chhunzawm phal a ni ang. ByteDance leh China sorkar hi an inzawm tlat a, Chinese Communist Party (CCP) hi an ṭan zawk a nih chuan khap an ni ang," tiin a sawi. House of representative-a TikTok khapna tur bill sawiho a nih dawn hian US Capitol building hmaah TikTok khap duh lotu tam tak an pung khawm a ni.

US Treasury secretary hlui, Steve Munchin chuan TikTok lei tura ruahmanna siam a duh thu a sawi. Munchin chuan investor eng emaw zat khawma TikTok lei mai chu a remchan dawn bakah, US himna atana hlauhawma ngaih a nih chuan US-in leiin, enkawl mai se a felfai tur thu a sawi chhuak. Hetih lai hian TikTok neitu, ByteDance erawh chuan TikTok hralh tumna an neih loh thu an sawi a ni.