Qatar-ah Israel leh Hamas inbiakna neih chhunzawm

Israel leh Hamas, Gaza Strip-a an indo mek chuan inkahhai puang turin inbiakna neih ṭhin mah se rah ṭha a la chhuah thei rih lo. Israel lamin Hamas thil phut tihhlawhtlin harsa an tih avangin inbiakna hi chawlhsan a nih hnuah, nimin khan Qatar-ah inbiakna hi neih chhunzawm leh a ni tih Egyptian official lamin an sawi.

Qatar-a inbiakna neih hi Ramadan hnua inbiakna neih hmasak ber niin, khawvel ram dangte chuan kar ruk chhung inkahhai lailawk puang tura inremna an siam theih ngei an beisei hle. Hetih lai hian Hamas lam hian inkahhai an puang a nih chuan kar ruk chhung chauh ni lo, inkahhai tluantling siam an phut thung a ni. Mahse an thil phut hi Israel lamin an pawm theih loh avangin, three-stage plan rawtna an siam thar leh niin Egypt official-te chuan an sawi.

Hamas lam rawtna tharah hian kar ruk chhung inkahhai puan leh an mi hren mek mi 35 chhuaha, hemi chhan letna atan Israel-in an ram tan ina Palestinian tang mek zingah mi 350 chhuah an phut. Hamas chuan Palestinian tang 50 thlengna atan Israel sipai hmeichhia an hren panga zel an chhuah tur thu an sawi bawk. Hei bakah hian Gaza-a kawngpui pawimawh pahnih aṭangin Israel sipaite chu inhnukdawk a, indona avanga tlanchhia Palestinian mite chu Gaza hmar lama an kir leh phalsak an phut bawk. A thawh hnihnaah chuan hunbi tiam awm loin, inkahhai tluantling puan a, hemi atan hian Hamas chuan Israel sipai an la hrente chu Palestinian tang nena inthleng leh an rawt. A thawh thumnaah Israel-in Gaza kawngpui a dannate a titawp vek anga, Gaza Strip indin thar lehna tura hmalak pawh a phalsak tur a ni tiin, Hamas lam hian Israel mi ruang an kawlte an pe chhuak ang tiin an sawi.

Israel prime minister Benjamin Netanyahu chuan Hamas rawtna thar siam chu thil awihawm lo tak a ni a ti a, mahse, inkahhai puan a nih theih dan ngaihtuah turin Qatar-a Israel aiawh tirh erawh a remti tho a ni.

Israel beihna avangin chhungkaw khata mi 36-in nunna chan

Muslim thla serh, Ramadan hman ṭan a nih hnuah, kar liam ta Zirtawpni zan khan Israel sipaite beihna avangin Gaza-a chhungkaw khat atangin mi 36 laiin nunna an chan phah a ni.

Hamas hnuaia awm, Gaza-a health ministry chuan he inbeihna thleng hi an dem thu an tarlang. He inbeihna hmun aṭanga dam chhuak pakhat chuan an awm khawmna in chu bomb hmanga beih a nih thu sawiin, a chhungte thi zawng zawng chu martar an nih thu a sawi bawk.

Israel hian tunhnai chho aṭang khan Gaza Strip-ah a hma aiin beihpui a thlak ngawrh chho a ni. Zirtawpni zan khan vawi 60 chuang air strike hmangin Gaza chu an bei niin Hamas media office chuan an tarlang a, chung zinga pakhat chuan Nuseirat-a Tabatibi chhungkaw chenna hmun hi a deng fuh ta a ni.