Niger-in US nena military accord siam a sût

Niger-a sipai sorkar chuan US nena inremna, military accord an lo siam tawh chu a sût.

Sipai sorkara thupuangtu, Colonel Amadou Abdramane chuan inremna an lo siam tawh hi sut a nih thu nimin khan a puang. He inremna an siamah hian Department of Defence hnuaia sipai leh civilian staff-te chu Niger ramah an awm phalsak an ni.

Kar liam ta khan Assistant Secretary of State for African Affairs, Molly Phee kaihhruaiin US official team chuan Niger hi an tlawh a, an zingah hian US Africa Command-a commander General Michael Langley pawh a tel. Abdramane chuan US palaite hian diplomatic protocol an zawm lo a, palai kal turte hi tute nge hrilh an nih loh bakah, an thlen hun tur leh an thu ngaihtuah tumte pawh engmah hriattir an ni lo tih a sawi. Hemi hnu hian Niger ram chuan US nena military accord an siam hi a sut zui ta a ni.

Niger-ah hian US sipai hi 1,100 vel an awm mek a, US hian base pahnih neiin, pakhat chu drone base, Air Base 201 tih a ni a, USD mtd. 100 chuang senga a siam a ni.